Ihrer furstliche durchlaucht ec. mündtliche letzte erclärung in relligionssachen gegen der lannde Steyr, Khärn - den und Crain sambt der fürstlichen graffschafft Görtz alhie zu Pruckh mit volmechtigen gwalt anwesunden ausschüßn.

Den neundten tag february vor der frue maltzeitt haben ihr furstliche durchlaucht etc. die herren der lannde ausschüß sambt den stetten unnd märck - ten, so der augspurgischen confession zuegethan, in ihr camer gefordert unnd auff ire jungste unnd schließliche ubergebene relligionsschrift die erclärung unnd antwort in gegenwurt irer furstlichen durchlaucht etc. herrn gehaimbe räthe, herrn Georgen Khevenhüllers zu Aichlberg freyherrn etc., obristen hoffmaister unnd lanndtshauptman in Khärndtn etc., herrn Wolffen, herrn von Stumberg etc., obristen erbschenckhen in Steyer und obristen camrer, herrn Hannßen Khobantzl von Prossegg, Nieder Osterreichs camer - presidenten etc. unnd doctorn Wolfgang Schrantzen, cantzlers etc. mündtlich gethan. Wie volgt: Wiewol ich mich gäntzlich versechen, ir wurdet mit meiner entlichen er - clärung in dißen relligions articl gehorsamblich ersettigt unnd zufriden sein, weil ich bei meiner seelen saligkhait vermeldet unnd gebetten, das ich verner nit gehn khündte unnd solches alles also bewilligt habe, das ihr verner ainich mißtrauen in mein person nit setzen sollet, nichts desto weniger, weil ihr mir noch ein schrifft uberantwort, so hab ich mein mainung, wie ichs verstehe, jetzt abermal antzaigen wellen. Unnd zweifelt mir nit, ihr werdet mich, wie ichs hievor auch angetzaigt, ver - nomen haben. Nemblich das ich alles das, was ich unnd meine räthe anist zuegesagt, die relligions pacification, so in Steyr beschlossen, das - selbig alles aller rechten gebür nach halten will. Unnd hab mich nit zu er - innern, das ich darwider solt gehandlt oder sunst ernstliche bevelch dar - wider außgehen lassen, unnd will solche pacification noch redlich halten gegen euch, die ir alda beisamen unnd alle, so der augspurgischen confession zuegethan seindt. Doch das man sich auch gebürlich verhalte, das schmahen unnd lestern, wie es dann durch eure prediger beschiecht, gäntzlich abschaffen, welches ich meines thails auch thuen will. Unnd weil ich mich hievor erclärt hab unnd noch also erclären thue, das ich in meiner alten, wahren catholischen, christlichen relligion, darinn ich geborn, getaufft, ertzogen unnd biß in mein grueben darin bleiben will, das demnach ich sambt den meinigen in meinem gwissen auch umbetrüebt unnd unbekhummert gelassen, unnd so wenig ich euch in eurn gwissen nit bekummern unnd betrüeben will, ir dasselb mir unnd den meinigen auch nit thuet, sundern alles in guettem, christlichen vertrauen unnd ainigkhait ain thail so wol als der annder verbleibe, biß der almechtig gott mitl unnd weeg schickht, das anist dise sach, wie ich zu göttlicher almacht hoffe, zu christlicher ainhelligen vergleichung unnd in einem rechten verstanndt khumben khan. Doch behalt ich mir lautter bevor, die disposition in meinen stetten unnd märckhten unnd aigenthumblichen güettern nit der mainung, wie man darvon sagen wöllen, das ich die predicanten unnd schuelen zu Grätz, Laybach, Clagenfurt unnd Judenburg wil vertreiben. Doch das ihr das schmähen unnd lestern auch abstellet, mich unnd die meinigen relligionsver - wanten nit so gar mit spöttlichen wortten, nit allain durch die prediger, sonndern auch anndere, wie man wol waiß, angreiffen thuet, und wann man einen auf der gassen sicht, ein spöttl anhengkht, welches nit sein soll, sundern man soll brüederlich unnd christlich von einander reden. Also wil ich die burger auch nit beschwären in iren gwissen, wie ich inen dann bißheer wegen der relligion nit ain harl gekrümbt. Das will ich hinfort auch nit thuen. Aber das sie ires gefallens in die stett unnd märckht predicanten auf - nemen sollen, das khan ich auch nit leiden. Aber sie wil ich in iren gwissen unbekhummert lassen. Darauff mügen sie sich wol verlassen. Unnd ich wil euch nicht allain hiemit ermant haben, sonnder ich bitt euch umb gottes willen, ihr, als meine lieben underthanen, wellet alles mistrauen auf ein seit stellen unnd was ich euch zuegesagt hab, das will ich treulich halten, dann ich maine es mit euch genediglich und vätterlich unnd stell es gar auf khainen schrauffen, wie man sagt. Wöllet derwegen nun mehr zu denen sachen, darumben man alhie zusamen khumben, fürderlich greiffen unnd gedenckhen, wie es den armen christen auf den Gränitzen gehet, das versehe ich mich gentzlich zu euch unnd will auch jederzeit eur genedigster herr unnd landts - fürst sein unnd bleiben. Nach disem mündtlichen vermelden haben die herrn der lande ausschüß ein unterredt in die taflstubn genomen unnd nach gehaltner umbfrag hat herr Hannß Friedrich Hoffmann, freyherr, als marschalckh irer furstlicher durchlaucht etc., verrer dise mündtliche antwortt geben: Die gehorßamisten der lannde ausschüß der augspurgischen confession zuegethan, irer furstlicher durchlaucht etc. jederzeit gethreue, gehorßamiste landtleüth unnd underthanen, haben diße eur furstlichen durchlaucht etc. genedigiste unnd milde mündt - liche erclärung mit höchster freudt angehört unnd mügen nach (wie zuvor zum öfftermallen) gott zu einen warhafftigen zeugen wol nemben, das sie biß daheer annders nichts gesuecht, gewünscht ader begert haben, dann das ein bestänndige, guette rhue unnd ainigkhait zwischen disen baiden relligionen angerichtet, also das sich die, so unnßerer relligion der augspurgischen confession zuegethan sein, von eurer furstlichen durchlaucht etc. relligionsverwanndten khainer gefahr, widerwertigkhait oder ver - folgung zu besorgen, wie sie sich dagegen bei den unnßrigen nit anders als alles liebs und guets zuversehen gehapt unnd noch. Dieweil sie dann eur furstlichen durchlaucht etc. jetzige genedigiste, mündtliche erclärung und vertröstung annderst nit verstehen khünnen, dann das es irer der lande negst ubergebenen schrifftlichen erclärung nichts durchaus zuwider, sander ein genedigiste ratification derselben sey, wiewol sy an eurer furstlichen durchlaucht etc. gendigisten wolmainen hievor nie getzweiffelt. Allain weß sie sich der mißgünner unnd unruebigen leüth halben besorgen müessen, so wolte inen doch khains weegs gebüren, in eur furstlichen durchlaucht etc. lanndts - fürstliche genedigiste wort ainichen zweiffel zustellen. Danckhen demnach zu vordrist dem almechtigen gott, der dißes ihr lanngwürigs seüfftzen, bitten und flechen zu einen solchen gnedigen fridlichen endt geschickht hat unnd dann auch irer furstlichen durchlaucht etc. selbst als iren genedigisten herrn unnd lanndtsfürsten der so vätterlichen erclärung. Unnd bitten eur furstlichen durchlaucht etc. daneben gar unterthenigist düemüttig, da sie mit vorigen iren öfftern replicieren derselben was zuwider gehandelt hetten, sie wellen inen solches durch gottes barmherzigkhait willen genedigist vertzeichen unnd annders nit deütten, dann das es ires gwissens befridung und versicherung wegen ihr höchste notturfft erfordert hat, da sie sonsten sich gegen eur furstlichen durchlaucht etc. mit aller underthenigkhait des gehorßambs altzeit befleissigt. Es bedanckhen sich auch neben den gehorsamisten landtleüthen die von stetten unnd märckhten gar düemüettigist diser genedigisten unnd vätterlichen erleütterung, das sie unnd ire mitverwandten nit weniger als andere in iren gewissen befridet und versichert sein. Erbietten sich darauff die gehorßamisten ausschüß für sich und ire prin - cipaln sament und sonderlichen, das sy solches umb eur furstlichen durchlaucht etc. derselben geliebte erben unnd nachkhumen zu ewig zeitten ungespart leib, guetes unnd bluets danckhbarlichen zuverdienen, sich nach eüsseristen vermügen befleissen wellen. Sie seindt auch urbiettig mit erster mügligkhait eurer furstlichen durchlaucht etc. genedigsten begern nach zu der bewilligung zugreiffen und sich darinnen also gehorßamist zuertzaigen, das eur furstlichen durchlaucht etc. ihr guett willigkait unnd gehorßamiste naigung in außgang der hanndlung würckh - lich spüren unnd befinden sollen. Darauff bitten Sie gar unterthänigist eur furstlichen durchlaucht etc., die wellen inen sie samentlichen sambt stetten unnd märckhten auch derselben inwonnern, die dieser relligion zuegethan sein, mit landtsfürstlichen gnaden jederzeit lassen bevolchen sein. Darauff haben ihr furstlichen durchlaucht etc. verrer angetzaigt, was ich euch zuegesagt unnd wie ich mich gegen euch erclert hab, dem will ich also nachkumen, versiche mich gäntzlich, ihr werdets auch thuen. Unnd damit man hinfüro in gleichem, vertreulichen verstanndt verbleiben müge, so soll man nit immerzue ein jeden ohrenploßer glauben geben, sundern das man erstlich guetten grundt unnd bericht einneme unnd mir solches antzaigen und berichten. Auf das hat herr Hoffman auch zu beschluß verrer vermelt, die gehorßamisten der lannde ausschüß bitten gleichts fals (des ich zuvermelden ver - gessen) ihr furstlichen durchlaucht etc. unterthenigist, sie wellen denen personen, welche zwischen irer furstlichen durchlaucht etc. unnd derselben gehorßamisten unnd getreuen lannde unainigkhait unnd mißverstandt pflantzen, auch genedigist khainen glauben geben oder sich wider derselben getreue unterthanen bewegen lassen unnd sie wellen auch jedertzeit, do inen was beschwärlichts fürfelt, zu irer furstlichen durchlaucht etc. als irem genedigisten hern und landtsfürsten ihre zueflucht haben. Unnd weil dise mündtliche tractation aus dem Mundt, wie zu beeden thaillen geredt, treulich beschrieben unnd auffs papier glaubwürdig gebracht werden, demnach unnd zu mehrer khünfftigen gedechtnus der sachen haben sie die herren ausschüß der augspurgischen confession zuegethan, solches alles abgehört unnd jedem lanndt unter irer aignen handt - schrifft unnd pettschadt gleichlauttundt concept zuegestelt. Geschehen zu Pruckh an der Muer den neündten februari anno im achtundsibentzigisten. Hannß Fridrich Hoffman, freyherr etc. landt- und erkiester marschalck, Hänibäl, freyherr zu Eckh, Ott von Ratmanstorff Geörg, freyherr zu Herberstain Ferdinandt Hoffman, freyherr etc. Wilhalbm von Gleispach, freyherr von Scheyr Achatz, freyherr von Thurn Paul, freyherr von Thanhaußen Michel Rindsmaul Franz von Poppendorff L. von Kholnicz Lienhardt Weltzer zu Eberstain etc. Maximilian von Lamberg Erasm Stadler, ritter Hanß von Gallenberg, freyherr von Holneckh Eraßm von Saurau Ludwig Ungnadt, freyherr Wilhalbm von Gera auf Arnfelß Melchisedech Senuß zu Freidenberg Bärtlme Khevenhüller, freyherr etc. Caspar Mandorffer zu Mandorff Wolff Zwickhl Hanß Frantz von Neuhauß Jonas von Wilfferstorff Wilhalbm von Rottal, der elter zu Neudau Jacob Zäch, ritter Niclaß Banhan zu Wolfspüchl Wilhalbm von Rattmanstorff zum Weyer Hannß von Pranckh Sigmundt Weltzer von Eberstain Michl Strasperger Adam von Lenghaimb Hannß Fridrich von Trautmannstorff Hanß Khemeter Philipp Dräxler von Neuhauß Maximilian von Khuenberg Balthauser Herbstperger Gall, freyherr zu Räckhnitz Victor Weltzer Lienhardt Schütter Lienhardt von Kheuttschach, ritter Lienhardt Cren Urban Thalman Balthaußer Pinter